Barbanza, por Certo: Boiro: avanzan as obras no colexio de Praia Xardín, que rematarán esta semana

12.4.12

Boiro: avanzan as obras no colexio de Praia Xardín, que rematarán esta semana

A superdelegada Belén do Campo supervisou as obras de mellora do CEIP Praia Xardín, no que xa non era sen tempo que se actuara
Estanse a impulsar os traballos de acondicionamento da antiga casa do conserxe como novo equipamento para o centro

Boiro, 12 de abril de 2012.- A delegada territorial da Xunta na Coruña, Belén do Campo, visitou esta mañá o colexio de educación infantil e primaria (CEIP) Praia Xardín, de Boiro, no que se continúa a realizar obras de mellora e acondicionamento de novos espazos cun investimento no que vai de curso de máis de 75.000 euros.

Do Campo percorreu as dependencias escolares acompañada polo xefe territorial de Educación, Indalecio Cabana, o alcalde da localidade, Juan José Dieste, o director do centro, José Manuel Vilas, e varios membros da Asociación de Pais e Nais de Alumnos. A representante do Executivo galego na provincia recordou que o Goberno autonómico, a través da Consellería de Cultura e Educación, está a acometer na actualidade traballos para o acondicionamento da antiga casa do conserxe como novo equipamento para o centro, que ben podería destinarse a patio cuberto ou a biblioteca, segundo o acordo que adopte o consello escolar en breve. A actuación non está a afectar á vida diaria da comunidade educativa e avanza a bo ritmo, polo que, segundo as previsións do departamento autonómico, estará rematada esta mesma semana.

A consellería ten consignado para estas obras unha partida de 7.649 euros, aos que se suman outros 67.423 euros destinados ao longo deste ano a mellorar as instalacións educativas. Así, hai poucas semanas remataron as actuacións para reparar a cuberta do centro, a través da eliminación das goteiras, a retirada das tellas en mal estado e o illamento térmico. Ademais, procedeuse ao arranxo da instalación eléctrica e do pavimento dunha zona do comedor.

Coa execución deste proxecto, así como o peche na entrada do colexio que está a executar o Concello, quedan resoltas as deficiencias detectadas no centro escolar e que foran trasladadas polo alcalde la localidade á xefatura territorial. Deste xeito, a consellería dá mostra do seu interese por manter nas mellores condicións as instalacións educativas, que neste caso beneficiará aos 93 alumnos de Educación Infantil e os 251 de Primaria que estudan no CEIP Praia Xardín. “A Xunta traballa para seguir avanzando na adecuación das infraestruturas educativas, co fin de continuar mellorando as condicións de traballo e estudo dos mestres e alumnos”, sinalou a delegada.

Tamén, en Boiro:

Música e roteiro: o venres 13, Curota Sound e Mustang. O 14, Boiroverde