Rianxo: Antrospinos quenta motores para o seu festival cun concurso de teloneiros e outro de deseño de carteis

• O Festival Antrospinos de Taragoña chega este ano ao capítulo 5
  

Este foi o cartel gañador do ano pasado. Mellóreno!

Rianxo, 19 de abril de 2012. En Taragoña se hai alguén especializado en festas e festivais son os da asociación Antrospinos, que xa se compracen en comunicar a nova edición do concurso Teloneiros FAP 2012, "unha oportunidade única -disque- para todos aqueles músicos que están a comezar a súa carreira artística e buscan un lugar no que promocionarse".

O Festival vaise celebrar desta volta en Taragoña (Rianxo) os días 27 e 28 de xullo e acollerá outro ano máis o escenario Carballo no cal se darán cita na tarde do sábado, despois da Matraquillada, os concertos -disque- máis vibrantes, rompedores e enerxizantes, os interpretados polos dous grupos gañadores do concurso Teloneiros 2012!

"Se es galeg@, tes un grupo de música ou es cantautor/a e desexas promocionarte, non o dubides, preséntate ao noso concurso enviando un correo-e ao enderezo festivalantrospinos@gmail.com co teu nome completo, nome do grupo, breve descrición do estilo musical e un vídeo para podermos ver a túa graza sobre o escenario. Só con isto entrarás a formar parte dos concursantes de Teloneiros. Os dous grupos gañadores serán informados na segunda semana de xuño, poñéndonos en contacto con eles a través do mesmo correo-e. O premio será formar parte do Escenario Carballo ademais do aboamento dunha cantidade por desprazamentos", explican os organizadores.

O concurso ponse en marcha a partires de xa, 19 de abril de 2012, e remata o 5 de xuño ás 00.00 h. A partir deste intre non se recollerán máis propostas.

Deseño do cartel

O devandito concurso consiste na creación dun deseño para o cartel do Festival AntrosPinos 2012. Unha vez realizada a obra, de estilo libre, deberá enviarse ao enderezo electrónico festivalantrospinos@gmail.com en formato PDF, xunto co nome completo do autor, un número de contacto e enderezo-e.

O prazo para enviar os traballos está aberto desde xa,  ata o 10 de xuño ás 00.00 h. A partir dese intre non se recollerán máis propostas.

Requisito: O deseño debe conter o seguinte texto: "Festival Antrospinos 2012. Capítulo 5. 27 e 28 de xullo. Taragoña, Rianxo". Na orde, colocación e forma que se considere. 

O FAP resérvase o dereito a distribuír sobre o deseño os nomes dos grupos participantes no festival 2012.

PREMIO: O deseño elixido pasará ser o CARTEL DO FAP 2012. Distribuirase por unha ampla zona da xeografía galega, figurando nel o nome do seu autor ou autora, que recibirá un agasallo de recoñecemento na tarde do sábado, durante o festival.

O Festival Antrospinos é un acontecemento musical que se celebra cada última fin de semana de xullo en Taragoña, Concello de Rianxo, desde hai cinco anos. Nel xúntanse diferentes estilos musicais que van desde o folk ao ska, pasando pola música de fusión ou o rock galego. Enxebrismo e modernidade van da man neste evento organizado pola asociación do mesmo nome, sen ánimo de lucro, cuxos obxectivos son tamén outras actividades a realizar durante o ano de carácter cultural, ecolóxico e de recuperación das tradicións.

Para saber máis do Festival Antrospinos consulte a páxina web www.festivalantrospinos.es ou atópeos no Facebook http://www.facebook.com/#!/asociacionFAP

Posted via email from Certo.gl, o xornal dixital de Barbanza e Noia