Ribeira: o parque natural de Corrubedo recibiu preto de trescentos mil visitantes ata setembro

• Dende o centro de recepción de visitantes deste parque natural constatan que máis do 35% das visitas proceden da comunidade galega, máis do 55% veñen doutras comunidades, e o 8,5% son estranxeiros
• Xullo e agosto foron os meses nos que se rexistraron máis visitas, con 73.600 e 80.800 respectivamente
• Este parque natural abrangue 9.625 ha e está composto polo complexo dunar, a praia de Corrubedo), e as lagoas de Vixán e Carregal

A gran duna, dende a praia de Corrubedo

Ribeira, 20 de outubro de 2012.- A Consellería de Medio Ambiente, Territorio e Infraestruturas sinala hoxe que o Parque Natural do Complexo Dunar de Corrubedo e Lagoas de Carregal e Vixán recibiu un total de 294.200 visitantes no que vai deste ano 2012.

Dende o centro de recepción de visitantes deste parque natural constatan que máis do 35% das visitas proceden da comunidade galega, máis do 55% veñen doutras comunidades, e o 8,5% son estranxeiros.

O período no que este parque rexistrou máis visitas correspóndese cos meses de xullo e agosto, etapa estival na que a afluencia turística increméntase nesta zona de Barbanza debido aos seus areais. No mes de xullo, máis de 73.600 visitantes achegáronse a este parque, e no mes de agosto, 80.800 visitas foron as recibidas.

No seguinte cadro amósase a estimación estatística de visitantes ao exterior do Centro de Recepción de Visitantes do Parque Natural do Complexo Dunar de Corrubedo e Lagoas de Carregal e Vixán:

MES	Estimación Visitantes
XANEIRO	8.800
FEBREIRO	12.000
MARZO	19.100
ABRIL	13.800
MAIO	18.900
XUÑO	44.800
XULLO	73.600
AGOSTO	80.800
SETEMBRO	22.400
Total Período 2012	294.200

O parque natural
O parque de Corrubedo está situado na Barbanza, exactamente na esquina occidental da península de Barbanza entre a ría de Arousa e a de Muros e Noia, no municipio de Ribeira.

Este parque natural abrangue 9.625 ha e está composto polo complexo dunar, a praia de Corrubedo (5 km), e as lagoas de Vixán e Carregal.

Cómpre destacar a existencia da duna máis grande de Galicia, xa que ten máis dun quilómetro de lonxitude, 20 metros de altura e 250 metros de ancho. Ademais o complexo dispón de dúas grandes lagoas, unha doce e outra salgada, con humedais e marismas para a fauna e a flora.

A lagoa de Vixán é de auga doce, debido ao río do Muíño que desemboca nesta e a de Carregal é salgada, comunicada co mar por unha canle que divide a praia en dúas partes. A existencia destas lagoas permite a diversidade de fauna e flora, destacando anátidos, limícolas, aves mariñas e paxaros.

Relacionadas, na nosa hemeroteca:

O parque natural, sen convocar xunta consultiva en máis de tres anos

Adega critica á Xunta por querer máis ladrillo e cemento para o parque natural

Critican á Xunta por anular as axudas para parques naturais

Posted via email from Certo.gl, o xornal dixital de Barbanza e Noia